Na Eleuteri Mangi, WUSM
Kamati ya Kudumu ya Bunge ya Elimu, Utamaduni na Michezo imepokea na kujadili
taarifa ya utekelezaji wa miradi mbalimbali ya sekta ya michezo ambayo imewasilishwa
na Wizara ya Utamaduni, Sanaa na Michezo leo Oktoba 23, 2023 jijini Dodoma.
Akizungumza wakati wa kikao hicho na Wajumbe wa Kamati hiyo pamoja na uongozi
wa Wizara ya Utamaduni, Sanaa na Michezo, Mwenyekiti wa Kamati hiyo Mhe. Husna
Juma Sekiboko amesema kamati yake itaendelea kushirikiana na Serikali kupitia
Wizara hiyo ili kuhakikisha sekta ya michezo nchini inaendelea kupiga hatua na
kuwanufaisha wananchi kiuchumi.
“Mhe Rais Dkt. Samia Suluhu Hassan ameipa kipaumbele sekta ya michezo tangu
alipoingia madarakani, sote ni mashahidi, maono yake ni makubwa kwenye sekta hii”
amesema Mhe. Husna.
Kwa upande wake Waziri wa Utamaduni, Sanaa na Michezo Dkt. Damas Ndumbaro
akijibu hoja mbalimbali zilizoulizwa na Wajumbe wa Kamati hiyo ukiwemo ukarabati
unaoendelea wa Uwanja wa Benjamin Mkapa utakaogharimu kiasi cha Shilingi Bilioni
31 hadi kukamilika kwake Agosti 2024, amesema kuwa ukarabati wa awamu ya kwanza
ni asilimia 11 na umefanyika katika maeneo machache hatua iliyoruhusu kufanyika kwa
ufunguzi wa michuano African Football League (AFL).
Dkt. Ndumbaro ameeleza kuwa ukarabati huo umewezesha kufanyika wa ufunguzi wa
michuano hiyo Oktoba 20, 2023 jijini Dar es Salaam iliyoambatana na mchezo kati ya
timu ya Simba ya Tanzania na Al Ahly ya Misri uliofuatiliwa na kutazamwa na wapenzi
wa soka ndani na nje Tanzania pia kutumika katika mechi ya ligi hiyo kati ya TP
Mazembe ya nchini Jamhuri ya Kidemokrasia ya Congo na Esperance ya Tunisia
uliofanyika Oktoba 21, 2023.
Aidha, Waziri Dkt. Ndumbaro amesema Serikali itajenga Uwanja wa Arusha ambao
utakidhi vigezo vya Shirikisho la Mpira wa Miguu Afrika (CAF) na utatumika kwenye
michuano ya AFCON 2027 kwa kuwa jiji la Arusha pamoja na sifa nyingine lina hoteli
zaidi ya tano zenye hadhi ya nyota tano ambacho ni kigezo mojawapo cha nchi kupewa
dhamana ya kuandaa mashindano hayo.
Waziri Dkt. Ndumbaro ameongeza kuwa Serikali inaendelea na mpango wa ujenzi wa
Uwanja wa Dodoma utakaokuwa na uwezo wa kuchukua watu 30,000 ikiwa ni
utekelezaji wa Ilani ya Uchaguzi ya Chama cha Mapinduzi Ibara ya 234 kwamba
inayoelekeza ujenzi wa uwanja wa michezo Makao Makuu ya nchi.
Viongozi wengine walioshiriki kikao hicho ni Naibu Waziri Mhe. Hamis Mwinjuma, Katibu
Mkuu Bw. Gerson Msigwa, Menejimenti ya Wizara pamoja na Wataalam wa Wizara
hiyo.
